Վիկտորիա մեծ անապատ (անգլ.՝ Great Victoria Desert), ավազոտ անապատԱվստրալիայի հարավում։ Տարածությունը 300 000 կմ² է։ Ձգվում է Սթյուարդ լեռնաշղթայից մինչև Աղի լճեր հարթավայրը, 1200 կմ երկարությամբ։ Առավելագույն լայնությունը արևելքում 550 կմ է, միջին բարձրությունը՝ 150—300 մ։ Ռելիեֆին բնորոշ են ավազային թմբաշարերը (10—30 մետր բարձրությամբ)։ Թմբերն ամրացված են փշոտ խոտաբույսերի ճիմերով, միջթմբային իջվածքներում կան ակացիաներ, գաճաճ Էվկալիպտներ։ Տարեկան տեղումները 125—250 միլիմետր են։ Անապատը համարյա զուրկ է աղբյուրներից և դժվարամատչելի է։ Վիկտորիա մեծ անապատով առաջինը անցել է անգլիացի հետազոտող Է․ Ջայլսը 1875 թվականին։
Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից (հ․ 11, էջ 447)։