Rritja e rrogave nga 1 korriku, ja kategoritë e administratës me 135 mijë punonjës që përfitojnë
26/06 18:12
Eksportet e mallrave janë tkurrur sërish në muajin maj, pas një gjallërimi që pësuan në prill.
Trendi i tkurrjes që vijon që nga fillimi i vitit ka vijuar dhe këtë muaj ndërsa vlera e tyre arriti në 35 miliard lek 12.4% më pak se një vit më parë.
Nga krahu tjetër edhe importet në vlerën e 79 miliardë lekëve erdhën me 1.6% tkurrje. Kjo ka bërë që të rritet deficit tregtar me më shumë se 8.9%, ndërsa gjithnjë e më shumë mallrat e importit po mbushin tezgat shqiptare ndikuar edhe nga favorizimi i forcimit të lekut.
Në një krahasim nga fillimi i vitit, importet janë dyfish më të larta në vlerë se eksportet, ndërsa diferenca nga një vit më parë u thellua me 18.9%.
Për muajin maj grupi që pësoi tkurrjen më të madhe ishin tekstilet dhe këpucët. Sektori fason tashmë ka hyrë në një spirale krize, që u përkeqësua edhe më tej nga forcimi i lekut.
Ndërkohë për majin edhe eksporti i fruta -perimeve, grupi performues i mirë i vendit në vitin e kaluar, u tkurr me 2.7%. Ndërsa në muajt e parë pati rritje të fortë në sasi, tashmë edhe shitjet janë ngadalësuar tregon INSTAT. Të gjithë grupet e tjera kanë ardhur gjithashtu me tkurrje përveç mineraleve, lëndëve djegëse dhe energjisë elektrike.
Ndërkohë sa i përket mallrave që kanë hyrë në Shqipëri, rritje në krahasim me një vit më parë ka pësuar grupi i ushqimeve dhe pijeve jo-alkoolike. Përveç tyre, sektori i ndërtimi ka nxitur edhe importin e materialeve të ndërtimit dhe metaleve si dhe makinerive dhe pajisjeve.
Sa i përket partnerëve tregtarë gjatë majit Shqipëria rriti ndjeshëm eksportet drejt Kosovës dhe Kinës, por i uli ato drejt Italisë dhe Greqisë.
Ndërkohë në maj më shumë mallra vendi ka marrë nga Turqia dhe Greqia, ndërsa ka ulur volumin me Italinë dhe Kinën.
Top Channel
