Игри за амбициозни програмери на игри

Замислете никогаш да не мора да се соочите со слатко-горчливото чувство на поминување на последното ниво од саканата игра. Така е на иновативниве платформи што ги поттикнуваат играчите да дизајнираат и да споделуваат творби со вградените алатки за менување. Уживајте во многуте нивоа генерирани од корисници и мини игрите од други обожаватели или бидете креативни и создајте си свои.

Брилијантноста на шармантнава игра во стил на аркадните игри е во тоа што сѐ што играте е создадено со нејзината алатка за творби. Може да ги учите основите на програмирањето игри во режимот Quest или да ги истражувате режимите Battle и Arcade, со многу игри создадени од други играчи. Има дури и заедница во којашто програмерите-почетници може да споделуваат искуства.

Оваа дрска платформска игра има над 90 нивоа во кампањата, но, ако тоа не ви е доволно, има интуитивен уредувач на нивоа што ќе ја истакне вашата креативност. Премисата на Levelhead е дека сте дел од футуристичка компанија за достава, па може да ги споделувате нивоата што ги создавате на бизнис табелите за најдобрите во „Одделот за маркетинг“. Колку повеќе луѓе ги играат, толку повисок ранг ќе достигнете.

Целта на Minecraft е да создадете свој свет и, со малку креативност, може да создадете сосем ново доживување, па дури и да ја пресоздадете омилената игра со коцки. Инспирирани од модови од трети страни, Minecraft додадоа неколку алатки за приспособување во минатото, вклучувајќи пакети со ресурси што ги менуваат елементите на играта, коцки за кодирање и пазар за содржини генерирани од корисници.

Дизајнирајте своја мапа за battle royale со новиот креативен режим на PUBG Mobile, World of Wonder. Од острови до облакодери, целосно може да ги дефинирате околината, оружјата и правилата за битката во која победникот добива сѐ. Кога ќе завршите, испратете ја творбата што може да се објави на страницата на WoW за да биде достапна за играње за сите.

Многумина амбициозни програмери на игри почнуваат создавајќи игри за Roblox. Некои игри генерирани од корисници станаа дури и попопуларни отколку AAA-насловите на другите платформи. Иако Roblox Studio, апликација за дизајнирање игри којашто го користи својот програмски јазик Lua, е достапна само на компјутер или Mac, сепак можете да играте многу игри генерирани од корисници на претпочитаниот уред.