Гордана Силјановска-Давкова официјално е новата претседателка на Македонија

Гордана Силјановска-Давкова со денешната инаугурација во Собранието официјално ја презема должноста претседател на државата и стана првата жена во Македонија што ќе ја извршува оваа функција. Таа се обврза дека должноста ќе ја извршува совесно и одговорно, ќе го почитува Уставот и законите и дека ќе го штити суверенитетот, територијалниот интегритет и независноста на Република Македонија.

„Ќе го почитувам овој парламент, ќе ги заборавам лошите моменти, ќе ги помнам само добрите, ќе бидам претседателка и на левата и десната страна, на сите граѓани, нема да правам разлика меѓу нив по етничка, верска, полова ни по која било друга основа. Ќе се обидам да ги оправдам овие илјадници гласови кои не се само најубав подарок за мојот роденден, туку и најголема обврска и одговорност“, истакна Силјановска-Давкова на инаугурацијата на 151 седница на Собранието.

Својот говор таа им го посвети на жените кои, рече, се оние заради кои се нафатила да се кандидира за оваа должност и затоа што сака да ги инспирира дека е можно во земјава и жена да стане претседател на државата. Нагласи дека довербата е многу важна и таа ќе ја оправда затоа што ја добила оваа можност и затоа што, рече, добила шанса да биде опкружена со многу жени.  

Првиот и основен критериум „за дружење“ со неа ќе биде стручноста и компетентноста, а владеењето на правото е тоа што оваа држава, рече, ќе ја направи европска, а не „владеење на малкумина, не владеење на мажите“. Порача дека е време е за единство „кое може да значи и женска филозофија и женска автентичност“ и дека државата ја имаме благодарение не само на комитите и партизаните, туку и на комитките како Сирма Војвотка и на партизанките како Вера Циривири-Трена, Вера Јоциќ и Ибе Палкуќа.

„Бидејќи ние умееме да се грижиме не само за себе, туку пред се за сите останати...За жал, жените ги нема многу во политиката. Среќна сум што ќе инспирирам други жени. Ако можам да бидам јас претседателка, можете и вие. На Балканот е се уште жив патријархатот, а силните жени може на поинаков начин да ги решаваат проблемите, цврсто верувам во тоа.  Многу храбри жени и умни жени сум видела во овој Парламент, но се чудев зошто ги нема на највисоки позиции. И еве, се случи и тоа. Јас ќе го пробивам патот, ама овде - и од десно, и лево, и среде, гледам многу умни, многу посветени жени кои ќе ги носам во умот и во срцето“, истакна новоизбраната претседателка.

Посочи дека и самата не можела да замисли ваква доверба со гласови од над 560 илјади граѓани и дека се‘ уште не може да верува во тоа, а дека единствен  човек кој тврдел дека тоа ќе се случи, рече, бил Христијан Мицкоски, кој ја уверувал дека „тоа ќе се случи кога ќе има хармонија меѓу математиката и емоциите“.

Уверението за избран претседател од Државната изборна комисија таа го прими вчера, на својот 71-роденден, откако беше објавен конечниот извештај од претседателските избори одржани на 24 април и 8 мај за кои немаше приговори за постапката за сумирање на резултатите. Според конечните резултати, Силјановска-Давкова доби 561.000 гласови, а 251.899 избирачи гласале за Стево Пендаровски, кој беше нејзин противкандидат и на претходните претседателски избори во 2019 година.

Силјановска-Давкова е родена на 11 мај 1953 во Охрид. Основно и средно образование завршила во Скопје (1973). Дипломирала на Правниот факултет во Скопје (1978), каде што и магистрирала, а докторирала на Правниот факултет во Љубљана во 1994 година.

Била избрана за асистент по предметот политички систем на Правниот факултет во Скопје (1989), за доцент по уставно право и политички систем (1994), а потоа и за редовен професор во 2004 година. Била член на Уставната комисија на Собранието на РМ (1990-1992) и министер во Владата на РМ (1992-1994). Експерт за избори на ООН и потпретседател на групата Независни експерти за локална самоуправа при Советот на Европа. Член е на Венецијанската комисија и автор на стотина научни трудови за уставното право и политичкиот систем.

Силјановска-Давкова е шестиот претседател на Македонија. Нејзини претходници беа првиот претседател Киро Глигоров, Борис Трајковски, Бранко Црвенковски, Ѓорге Иванов и Стево Пендаровски.

 

 

Во моментов нема коментари за веста. Биди прв да коментира...

Остави коментар