(1)

Skont l-Artikolu 17(1) tar-Regolament (UE) Nru 978/2012, jenħtieġ li pajjiż li huwa identifikat min-Nazzjonijiet Uniti (“NU”) bħala pajjiż l-anqas żviluppat jibbenefika mill-preferenzi tariffarji pprovduti taħt l-arranġament speċjali għall-pajjiżi l-anqas żviluppati “Kollox Minbarra Armi” (KMA).

(2)

Il-lista ta’ pajjiżi benefiċjarji tal-arranġament speċjali għall-pajjiżi l-anqas żviluppati msemmija fl-Artikolu 1(2), il-punt (c), tar-Regolament (UE) Nru 978/2012 hija stabbilita fl-Anness IV tar-Regolament. L-Artikolu 17(2) tar-Regolament (UE) Nru 978/2012 jistabbilixxi li l-Anness IV għandu jiġi rieżaminat kontinwament sabiex jirrifletti l-bidliet fir-rigward tal-kundizzjonijiet stabbiliti fl-Artikolu 17(1). Barra minn hekk, l-Artikolu 17(2) tar-Regolament (UE) Nru 978/2012 jistabbilixxi perjodu tranżitorju ta’ 3 snin għat-tneħħija ta’ pajjiż mil-lista ta’ pajjiżi benefiċjarji tal-KMA.

(3)

Il-Bhutan iggradwa mill-kategorija tal-pajjiżi l-anqas żviluppati tan-NU fit-13 ta’ Diċembru 2023. Għaldaqstant, il-Bhutan ma għadux jikkwalifika għall-istatus ta’ benefiċjarju tal-KMA skont l-Artikolu 17(1) tar-Regolament (UE) Nru 978/2012 u jenħtieġ li jitneħħa mill-Anness IV ta’ dak ir-Regolament. F’konformità mal-Artikolu 17(2) tar-Regolament (UE) Nru 978/2012, it-tneħħija tal-Bhutan mil-lista tal-pajjiżi benefiċjarji tal-KMA għandha tapplika wara perjodu tranżitorju ta’ 3 snin mid-data li fiha l-att delegat tal-Kummissjoni li jemenda L-Anness IV tar-Regolament (UE) Nru 978/2012 jidħol fis-seħħ. Għaldaqstant, jenħtieġ li l-Bhutan jitneħħa mill-Anness IV b’effett mill-1 ta’ Jannar 2028.

(4)

Għalhekk, jenħtieġ li l-Anness IV tar-Regolament (UE) Nru 978/2012 jiġi emendat,