İstifadəçi razılaşması
Meta insanların bir-biri ilə əlaqə yaratmasına, icmalar qurmasına və bizneslərini inkişaf etdirməsinə imkan verən texnologiyalar və xidmətlər qurur. Bu Razılaşma konkret şərtlərin tətbiq edilmədiyini açıq şəkildə ifadə etdiyimiz hallar istisna olmaqla, Facebook, Messenger və təklif etdiyimiz digər məhsullar, funksiyalar, tətbiqlər, xidmətlər, texnologiyalar və proqram təminatından (Meta Məhsulları və ya Məhsullar) istifadə etməyinizi tənzimləyir. Bu Məhsullar sizə Meta Platforms, Inc. tərəfindən təmin edilir.
Əksini göstərmədiyimiz halda sizdən Facebook və ya bu İstifadəçi razılaşmasının tətbiq edildiyi digər məhsul və xidmətlərə görə ödəniş almırıq. Əvəzində, bizneslər, təşkilatlar və digər şəxslər məhsul və xidmətləri ilə bağlı reklamların sizə göstərilməsi üçün bizə ödəniş edir. Məhsullarımızdan istifadə etməklə siz və maraqlarınız üçün uyğun hesab etdiyimiz reklamları sizə göstərə biləcəyimizlə razılaşırsınız. Fərdi məlumatlarınızdan sizə hansı fərdiləşdirilmiş reklamların göstərilməsini müəyyən etmək üçün istifadə edirik.
Biz fərdi məlumatlarınızı reklamverənlərə satmırıq və şəxsiyyətinizi bilavasitə müəyyən edən məlumatları (adınız, e-poçt ünvanınız və ya digər əlaqə məlumatlarınız kimi) xüsusi icazə vermədiyiniz halda reklamverənlərlə paylaşmırıq. Bunun əvəzinə, reklamverənlər reklamlarını görmələrini istədikləri auditoriyanın növü kimi məlumatları bizə verir və biz bu reklamları müvafiq məzmunla maraqlana biləcək insanlara göstəririk. Biz reklamverənləri insanların onların məzmunu ilə necə qarşılıqlı əlaqədə olmasını başa düşmək üçün reklamlarının performansı haqqında hesabatlarla təmin edirik. Bu Razılaşma çərçivəsində təmin edilən fərdiləşdirilmiş reklamların Meta məhsullarında iş prinsipi haqqında ətraflı məlumat almaq üçün aşağıda 2-ci bölməyə nəzər salın.
Məxfilik siyasətimiz gördüyünüz reklamları müəyyən etmək və aşağıda təsvir edilmiş digər xidmətləri təmin etmək üçün fərdi məlumatlarınızı necə toplamağımızı və istifadə etməyimizi izah edir. Məlumatlarınızın necə istifadə edilməsi ilə əlaqədar malik olduğunuz məxfilik seçimlərini nəzərdən keçirmək üçün istənilən vaxt müvafiq Meta məhsulunun parametrlər səhifəsinə də keçə bilərsiniz.
1. Təmin etdiyimiz xidmətlər
Missiyamız insanlara icma qurmaq və bütün dünyanı bir platformada birləşdirmək imkanı verməkdir. Bu missiyamıza nail olmaq üçün sizə aşağıda təsvir edilmiş Məhsul və xidmətləri təmin edirik:Sizə fərdiləşdirilmiş təcrübə təmin etmək:
Facebook-dakı təcrübəniz hər kəsin təcrübəsindən fərqlənir: bu təcrübə Facebook Xəbər lentində və ya videoplatformamızda gördüyünüz paylaşımlar, hekayələr, tədbirlər, reklamlar və digər məzmundan tutmuş izlədiyiniz Facebook səhifələri və Facebook Marketplace və axtarış kimi istifadə etdiyiniz funksiyalara qədər hər şeyi əhatə edir. Misal üçün, biz yaratdığınız bağlantılar, etdiyiniz seçimlər və seçdiyiniz parametrlər və Məhsullarımızda və onlardan kənarda paylaşdığınız məzmun haqqında məlumatlardan təcrübənizi fərdiləşdirmək məqsədilə istifadə edirik. Sizi sizin üçün maraqlı olan insanlar və təşkilatlarla əlaqələndirmək:
Biz istifadə etdiyiniz Meta məhsullarında sizə maraqlı olan insanlar, qruplar, bizneslər, təşkilatlar və digər istifadəçiləri tapmağınıza və onlarla bağlantı yaratmağınıza kömək edirik. Malik olduğumuz məlumatlardan sizə və başqalarına tövsiyələr etmək üçün istifadə edirik - məsələn, qoşula biləcəyiniz qruplar, iştirak edə biləcəyiniz tədbirlər, izləyə və ya mesaj göndərə biləcəyiniz Facebook səhifələri, izləyə biləcəyiniz proqramlar və dostluq etmək istəyəcəyiniz insanlar. Daha güclü əlaqələr daha yaxşı icmaların yaranmasına səbəb olur və biz inanırıq ki, xidmətlərimiz insanlar onlara maraqlı olan insanlar, qruplar və təşkilatlarla bağlantı yaratdıqda daha faydalı olur. Sizə özünüzü ifadə etmək və sizin üçün vacib məsələləri çatdırmaq imkanı vermək:
Facebook özünüzü ifadə etmək və ya dostlarınız, ailəniz və başqa istifadəçilərlə sizi maraqlandıran mövzularda ünsiyyət qurmaq üçün bir çox üsullar təklif edir - məsələn, Meta məhsullarında status yeniləmələri, fotolar, videolar və hekayələrin paylaşılması (parametrlərinizə uyğun olaraq), dostunuza və ya bir neçə istifadəçiyə mesajlar göndərilməsi və ya səs və ya videozəng edilməsi, tədbir və ya qrupların yaradılması, profilinizə məzmun əlavə edilməsi, habelə başqa istifadəçilərin məzmununuzla necə qarşılıqlı əlaqədə olması haqqında statistik məlumatların göstərilməsi. Bundan başqa, insanların Meta məhsullarında daha ifadəli və maraqlı məzmun yaratması və paylaşması üçün artırılmış reallıq və 360° video kimi texnologiyalardan istifadə etməsi yolları yaratmışıq və bu texnologiyaları araşdırmağa davam edirik. Sizə maraqlı ola biləcək məzmun, məhsullar və xidmətləri tapmağınıza kömək etmək:
Facebook və digər Meta məhsullarından istifadə edən çoxsaylı bizneslər və təşkilatların təklif etdiyi məzmun, məhsullar və xidmətləri tapmağınıza kömək etmək üçün sizə fərdiləşdirilmiş reklamlar, təkliflər və digər sponsorlu və ya kommersiya xarakterli məzmun göstəririk. Bu, aşağıdakı 2-ci bölmədə daha təfərrüatlı şəkildə izah edilib. Xidmətlərimizin təhlükəsizlik, əminlik və toxunulmazlığını təşviq etmək, zərərli davranışla mübarizə aparmaq və istifadəçilər icmasının təhlükəsizliyini təmin etmək:
İnsanlar yalnız özlərini təhlükəsiz və əmin hiss etdikləri halda Meta məhsullarında icma quracaqlar. Məhsul və xidmətlərimizin təhlükəsizliyini (o cümlədən, mövcudluğu, autentikliyi, bütövlüyü və məxfiliyi) qorumaq üçün bütün səylərimizi səfərbər etmişik. Biz Məhsullarımızdan potensial sui-istifadəni, başqalarına qarşı zərərli davranışı və icmamızı dəstəkləyə və ya qoruya biləcəyimiz situasiyaları aşkar etmək, o cümlədən istifadəçilərin qaydaları poza biləcək məzmundan etdikləri şikayətlərə cavab vermək məqsədilə dünyanın müxtəlif yerlərində xüsusi komandalarla işləyir, xarici xidmət təminatçıları və digər müvafiq qurumlarla əməkdaşlıq edir və qabaqcıl texniki sistemlər hazırlayırıq. Belə məzmun və ya davranış haqqında məlumat aldıqda həyata keçirdiyimiz qiymətləndirmə əsasında sizə bildiriş göndərilməsi, kömək təklif edilməsi, məzmunun silinməsi, müəyyən funksiyalara çıxışın ləğv edilməsi və ya məhdudlaşdırılması, hesabın deaktiv edilməsi və ya hüquq-mühafizə orqanlarına müraciət edilməsi kimi müvafiq tədbirlər görə bilərik. Məhsullarımızın istifadəçisinin yol verdiyi sui-istifadə halları və ya zərərli davranışı aşkar etdikdə, yaxud Meta Məhsulları, istifadəçiləri və icmasının təhlükəsizliyini təmin etmək məqsədilə məlumatları Meta şirkətləri arasında paylaşırıq. Məsələn, biz maliyyə məhsulları və xidmətləri təqdim edən Meta Şirkətlərinin təhlükəsizliyi və toxunulmazlığı təmin etməsi və tətbiq edilən qanunvericiliyə əməl etməsinə kömək etmək üçün məlumatları onlarla paylaşırıq. Meta bu tədbirin qanunla tələb olunduğunu və ya qanun çərçivəsində icazə verildiyini hesab etdiyi halda haqqınızda topladığı hər hansı məlumatlara çıxış əldə edə, onları saxlaya, istifadə edə və paylaşa bilər. Ətraflı məlumat almaq üçün Məxfilik siyasətimizə nəzər salın.Bəzi hallarda Nəzarət şurası şərtlərinə və nizamnaməsinə uyğun olaraq qərarlarımızı dəyərləndirə bilər. Burada ətraflı məlumat alın.
Hər kəsə təhlükəsiz və funksional xidmətlər təmin etmək üçün qabaqcıl texnologiyalardan istifadə etmək və onları inkişaf etdirmək:
Biz insanların fiziki imkanından və ya coğrafi məkanından asılı olmayaraq Məhsullarımızdan təhlükəsiz şərtlərdə istifadə edə bilməsi üçün süni intellekt, maşın öyrənməsi sistemləri və artırılmış reallıq kimi qabaqcıl texnologiyalardan istifadə edir və onları inkişaf etdiririk. Məsələn, bu kimi texnologiyalar görmə məhdudiyyəti olan insanların Facebook və ya Instagram-da paylaşılmış foto və ya videolarda nə və ya kimin təsvir edilməsini başa düşməsinə kömək edir. Biz eyni zamanda internetə çıxışın məhdud olduğu ərazilərdə daha çox insanın internet bağlantısına malik olması üçün universal şəbəkə və kommunikasiya texnologiyası qururuq. İcmamıza və Məhsullarımızın bütövlüyünə zərər vura biləcək təhqiramiz və təhlükəli fəaliyyəti aşkar etmə və silmə imkanımızı təkmilləşdirmək üçün avtomatlaşdırılmış sistemlər yaradırıq. Xidmətlərimizin keyfiyyətini artırmaq üsullarını araşdırmaq:
Biz Məhsullarımızı inkişaf etdirmək, sınaqdan keçirmək və təkmilləşdirmək məqsədilə tədqiqat fəaliyyəti ilə məşğul oluruq. Bura istifadəçilərimizlə bağlı malik olduğumuz məlumatların təhlil edilməsi və insanların Məhsullarımızdan necə istifadə etməsinin sorğular keçirilməsi, yeni funksiyaların sınaqdan keçirilməsi və nasazlıqların aşkar edilməsi yolu ilə başa düşülməsi daxildir. Məxfilik siyasətimizdə xidmətlərimizi inkişaf etdirmək və təkmilləşdirmək məqsədilə bu tədqiqatları dəstəkləmək üçün məlumatlardan necə istifadə etməyimiz izah edilir. Meta şirkətinin məhsullarında davamlı və səlis təcrübələr təmin etmək:
Məhsullarımız sizin üçün vacib insanlar, qruplar, bizneslər, təşkilatlar və digər istifadəçiləri tapmağınıza və onlarla bağlantı yaratmağınıza kömək edir. Sistemlərimiz istifadə etdiyiniz fərqli Meta şirkəti məhsullarında davamlı və səlis təcrübə yaşamağınız üçün layihələndirilib. Misal üçün, Facebook-da qarşılıqlı əlaqədə olduğunuz insanlar haqqında məlumatlardan onlarla Instagram və ya Messenger-də asanlıqla əlaqə yaratmağınız üçün istifadə edir və sizə Facebook-da izlədiyiniz bizneslə Messenger vasitəsilə əlaqə yaratmaq imkanı veririk. Xidmətlərimizə çıxışın təmin edilməsi:
Qlobal xidmətlərimizi göstərmək və sizə dünyanın müxtəlif yerlərindən olan insanlarla bağlantı qurmaq imkanı vermək üçün məzmun və məlumatları dünyanın müxtəlif yerlərində, o cümlədən yaşadığınız ölkədən kənarda yerləşən məlumat mərkəzlərimiz, xidmət təminatçılarımız, təchizatçılarımız və sistemlərimizə ötürməli, burada saxlamalı və paylaşdırmalıyıq. Bu qlobal infrastruktur xidmətlərimizin təmin edilməsi üçün zəruri və vacibdir. Bu infrastruktur Meta Platforms, Inc., Meta Platforms Ireland Limited və ya onların afilə edilmiş müəssisələrinin mülkiyyətində və ya nəzarətində ola və ya onlar tərəfindən idarə edilə bilər. 2. Xidmətlərimiz necə maliyyələşdirilir
Bu İstifadəçi razılaşmasının əhatə etdiyi Meta məhsullarından istifadə edərkən Facebook və təklif etdiyimiz digər məhsul və xidmətlərdən faydalanmaq üçün ödəniş etmək əvəzinə sizə fərdiləşdirilmiş reklamlar və biznes və təşkilatların özlərini Meta şirkətinin məhsullarında tanıtmaq üçün ödəniş etdiyi digər kommersiya və sponsorlu məzmunu göstərə biləcəyimizə razılıq verirsiniz. Fəaliyyətiniz və maraqlarınız kimi fərdi məlumatlarınızdan sizə daha münasib fərdiləşdirilmiş reklamlar və sponsorlu məzmun göstərmək üçün istifadə edirik. İnsanların məxfiliyinin qorunması fərdiləşdirilmiş reklam sistemimizin əsasını təşkil edir. Bu o deməkdir ki, reklamverənlərə kim olduğunuzu demədən sizə münasib və faydalı reklamlar göstərə bilirik. Biz məlumatlarınızı satmırıq. Biz reklamçıların bizə biznes məqsədi və reklamlarını görmələrini istədikləri auditoriyanın növü (məsələn, velosiped sürməyi sevən 18-35 yaşlı insanlar) kimi məlumatları bildirməsinə imkan veririk. Daha sonra reklamları bununla maraqlana biləcəyini hesab etdiyimiz insanlara göstəririk. Bundan başqa, reklamverənləri insanların Meta məhsullarında və buradan kənarda onların məzmunu ilə necə qarşılıqlı əlaqədə olmasını başa düşmək üçün reklamlarının performansı haqqında hesabatlarla təmin edirik. Məsələn, reklamçıların auditoriyalarını daha yaxşı başa düşə bilməsi üçün onları ümumi demoqrafik və maraqlarla bağlı məlumatlarla, məsələn, Madriddə yaşayan və proqram təminatı mühəndisliyini bəyənən 25-34 yaşlı qadınların reklamı görməsi haqqında məlumatla təmin edirik. Bizə bununla bağlı xüsusi icazə vermədiyiniz halda şəxsiyyətinizi birbaşa müəyyən edən məlumatları (sizinlə əlaqə saxlamaq üçün istifadə edilə biləcək və ya şəxsiyyətinizi göstərən adınız və ya e-poçt ünvanınız kimi məlumatlar) paylaşmırıq. Meta reklamlarının iş prinsipi haqqında ətraflı məlumat alın. Sizə yuxarıda təsvir edilmiş xidmətləri göstərmək üçün fərdi məlumatlarınızı toplayır və istifadə edirik. Məlumatlarınızı necə toplamağımız və istifadə etməyimiz haqqında məlumat almaq üçün Məxfilik siyasətinə nəzər sala bilərsiniz. Siz gördüyünüz reklamlar və reklamverənlər, habelə sizə hansı reklamların göstərilməsini müəyyən etmək üçün istifadə etdiyimiz məlumat növləri üzərində nəzarətə maliksiniz. Ətraflı məlumat.3. Facebook və icmamız qarşısında öhdəlikləriniz
Biz sizə və başqa istifadəçilərə bu xidmətləri missiyamıza nail olmaq məqsədilə təmin edirik. Bunun müqabilində üzərinizə aşağıdakı öhdəlikləri götürməyinizi tələb edirik:1. Facebook-dan kimlər istifadə edə bilər
İnsanlar öz mövqelərini və fəaliyyətlərini dəstəklədikdə icmamız daha təhlükəsiz və məsuliyyətli olur. Bu səbəblə siz: - Hesabınızda gündəlik həyatda istifadə etdiyiniz adı təqdim etməli;
- Özünüz haqqında dəqiq məlumat verməli;
- Yalnız bir hesab (özünüzünkü) yaratmalı və ondan şəxsi məqsədlər üçün istifadə etməli;
- Şifrənizi paylaşmamalı, başqalarına Facebook hesabınıza giriş imkanı verməməli və ya hesabınızı başqasına (icazəmiz olmadan) ötürməməlisiniz.
- 13 yaşınız tamam olmayıb.
- Cinsi istismar cinayətinə görə məhkum edilmisiniz.
- Daha əvvəl Razılaşmamızı, İcma standartlarımızı və ya Facebook-dan istifadənizə tətbiq olunan digər şərt və siyasətləri pozduğuna görə hesabınızı deaktiv etmişik. Razılaşmamızı, İcma standartlarımızı, yaxud digər şərt və siyasətlərimizi pozduğunuza görə hesabınızı deaktiv etsək, icazəmiz olmadan başqa hesab yaratmamaqla razılaşırsınız. Yeni hesab yaratmaq üçün icazə almaq öz mülahizəmizə əsasən təmin olunur və intizam tədbirinin yanlış və ya səbəbsiz olduğunu ifadə etmir, yaxud nəzərdə tutmur.
- Tənzimləyici qanunvericilik çərçivəsində məhsul, xidmət və ya proqram təminatlarımızı almaq hüququna malik deyilsiniz.
2. Meta məhsullarında nə paylaşa və edə bilərsiniz
İnsanların başqalarının təhlükəsizliyi və rifahı, yaxud icmamızın bütövlüyü bahasına deyil, özlərini ifadə etməsi və onlara görə vacib olan məzmunu paylaşması üçün Meta Məhsullarından istifadə etməsini istəyirik. Buna görə də aşağıda təsvir olunan şəkildə davranmamaqla (və ya başqalarının bu cür davranmasına kömək etməməklə, yaxud bunu dəstəkləməməklə) razılaşırsınız: - Məhsullarımızdan o halda istifadə edə bilməzsiniz ki, fəaliyyətiniz və ya paylaşdığınız məzmun:
- Bu Razılaşmanı, İcma standartlarını, yaxud Məhsullarımızdan istifadənizə tətbiq olunan digər şərt və siyasətləri pozur.
- Qanunsuzdur, yanıldıcıdır, ayrı-seçkilik yaradır və ya saxtadır (yaxud başqalarının Məhsullarımızdan bu yolla istifadə etməsinə yardım edir).
- Sizə məxsus deyil və ya paylaşmaq üçün lazımi hüquqlarınız yoxdur.
- Qüvvədə olan qanunvericilik çərçivəsində istisna və ya məhdudiyyətlərin tətbiq edildiyi hallar istisna olmaqla, başqasının hüquqlarını, o cümlədən əqli mülkiyyət hüquqlarını pozur (məsələn, başqasının müəllif və ya əmtəə nişanı hüquqlarını pozmaqla, yaxud saxta və ya məhsullar paylamaq və ya satmaqla).
- Viruslar, yaxud zərərli kod yükləyə, spam göndərmək üçün xidmətlərdən istifadə edə, yaxud xidmət, sistem və ya Məhsullarımızın müvafiq şəkildə işləməsinə, bütövlüyünə, fəaliyyətinə, yaxud görünüşünə xələl gətirə, müdaxilə edə, zərər verə və ya bunu çətinləşdirə biləcək başqa bir şey edə bilməzsiniz.
- Avtomatlaşdırılmış vasitələrdən istifadə edərək (əvvəlcədən icazəmiz olmadan) Məhsullarımıza giriş imkanı əldə edə, yaxud onlardan məlumat toplaya və ya giriş icazənizin olmadığı məlumatlara giriş imkanı əldə etməyə cəhd göstərə bilməzsiniz.
- Məhsulun istifadəçi adları və ya şifrələrini, yaxud qanunsuz giriş tokenlərini əvəz edə, toplaya və ya bunun üçün sorğu göndərə bilməzsiniz.
- Platforma Şərtlərində qeyd olunan hallar istisna olmaqla bizdən və ya xidmətlərimizdən əldə etdiyiniz hər hansı məlumatı sata, lisenziyalaşdıra, yaxud satın ala bilməzsiniz.
- Fırıldaqçı, təkrarlanan və ya əsassız şikayət və ya müraciətlərin edilməsi kimi hər hansı şikayət, işarələmə, etiraz və ya müraciət üsulundan sui-istifadə edə bilməzsiniz.
3. Bizə verdiyiniz icazələr
Xidmətlərimizi göstərməyimiz üçün bizə müəyyən icazələr verməlisiniz:- Yaratdığınız və paylaşdığınız məzmundan istifadə etmək icazəsi: Fotolar və ya videolar kimi paylaşdığınız və ya yüklədiyiniz bəzi məzmunlar əqli mülkiyyət hüquqları ilə qoruna bilər. Facebook-da və istifadə etdiyiniz digər Meta Şirkəti Məhsullarında yaratdığınız və paylaşdığınız hər hansı bu cür məzmun üzərində əqli mülkiyyət hüquqlarının (müəlliflik hüququ və ya əmtəə nişanları kimi) sahibi olaraq qalırsınız. Bu İstifadəçi Razılaşmasının heç bir müddəası sizi məzmununuz üzərində sahib olduğunuz hüquqlardan məhrum etmir. Məzmununuzu istənilən yerdə istənilən kəslə paylaşmaqda sərbəstsiniz. Bununla belə, xidmətlərimizi göstərərkən bu məzmundan istifadə etmək üçün sizdən müəyyən hüquqi icazələr ("lisenziya") almalıyıq. Bu lisenziyanın məqsədi Məhsullarımız və xidmətlərimizin yuxarıdakı 1-ci bölmədə təsvir edildiyi kimi təmin edilməsi və təkmilləşdirilməsidir. Məhsullarımızda və ya onlarla əlaqədar əqli mülkiyyət hüquqları ilə qorunan məzmunu paylaşdıqda, yerləşdirdikdə və ya yüklədikdə bizə məzmununuzun saxlanılması, istifadə edilməsi, paylanması, dəyişdirilməsi, yerləşdirilməsi, surətinin çıxarılması, ictimai şəkildə ifa edilməsi və ya nümayiş olunması, tərcümə edilməsi və ondan törəmə işlərin hazırlanması (məxfilik və tətbiq parametrlərinizə müvafiq olaraq) üçün istisnasız, kompensasiyasız, bütün dünyada ötürülməsi və altlisenziya verilməsi mümkün olan lisenziya verirsiniz. Bu o deməkdir ki, məsələn, siz Facebook-da foto paylaşanda bizə onu saxlamaq, surətini çıxarmaq və Meta Məhsulları və ya bu məhsul və xidmətləri dəstəkləyən xidmət təminatçıları kimi başqa tərəflərlə (yenə də parametrlərinizə müvafiq olaraq) paylaşmaq icazəsi verirsiniz. Bu lisenziyanın müddəti məzmununuz sistemlərimizdən silinəndə sona çatacaq. Paylaşdığınız, yerləşdirdiyiniz və yüklədiyiniz konkret məzmunu istənilən vaxt silə bilərsiniz. Bundan başqa, hesabınızı sildiyiniz halda şəxsi hesabınızda paylaşdığınız bütün məzmun da silinəcək. Hesabınızın silinməsi haqqında ətraflı məlumat alın. Hesabın silinməsi səhifə admini kimi paylaşdığınız və ya başqa istifadəçilərlə birlikdə yaratdığınız məzmunu, məs., Paylaşılan Albomlardakı digər üzvlərin gördüyü fotoları avtomatik silmir. Hesabın silinməsi prosesinə başlamağımızdan və ya məzmunun silinməsi sorğusunu almağımızdan sonra məzmunun silinməsi 90 günədək çəkə bilər. Məzmunu zibil qutusuna göndərsəniz, məzmunu daha tez silməyi seçmədiyiniz halda silinmə prosesi 30 gün sonra avtomatik başlayacaq. Belə məzmunun silinməsi prosesi davam edərkən başqa istifadəçilər məzmunu görmür. Məzmunun silinməsindən sonra onu ehtiyat nüsxələrdən və qəza hallarında bərpa sistemindən silmək daha 90 günə qədər çəkə bilər. Hesabın və məzmunun silinməsi prosesi aşağıdakı situasiyalarda başladığı halda məzmun 90 gün ərzində silinməyəcək:
- məzmununuz bu lisenziyaya müvafiq olaraq başqaları tərəfindən istifadə edilir və onlar bu məzmunu silmir (bu halda bu lisenziya məzmun silinənə qədər tətbiq ediləcək);
- 90 gün ərzində silinmə sistemlərimizin texniki məhdudiyyətləri ilə əlaqədar olaraq mümkün deyil - bu halda silinməni texniki baxımdan mümkün olan kimi həyata keçirəcəyik; və ya
- məzmunun dərhal silinməsi aşağıdakı imkanlarımızı məhdudlaşdıracaq:
- qanunsuz fəaliyyəti və ya şərt və siyasətlərimizin pozulması hallarını araşdırmaq, yaxud müəyyən etmək (məsələn, Məhsullarımız və ya sistemlərimizdən sui-istifadə hallarını müəyyən etmək, yaxud araşdırmaq);
- məhsullarımız, sistemlərimiz, xidmətlərimiz, əməkdaşlarımız və istifadəçilərimizin təhlükəsizlik, toxunulmazlıq və əmniyyətini qorumaq və özümüzü müdafiə etmək;
- dəlillərin, o cümlədən maliyyə məhsulları və xidmətləri təmin edən Meta şirkətlərinin qanunla tələb olunan hər hansı uçot öhdəliklərini yerinə yetirmək üçün saxladığı məlumatların saxlanılması üçün hüquqi öhdəlikləri yerinə yetirmək; və ya
- məhkəmə və ya inzibati orqan, hüquq-mühafizə orqanları və ya dövlət qurumunun sorğusunu yerinə yetirmək;
qeyd edilən hallarda məzmun silinməsinin dayandırıldığı səbəblər üçün zəruri olan müddət ərzində saxlanılacaq (dəqiq müddət konkret haldan asılı olaraq dəyişə bilər). Yuxarıda qeyd edilən halların hər birində lisenziya məzmun tamamilə silinənə qədər qüvvəsini saxlayacaq. - Adınızdan, profil şəklinizdən və reklamlar və sponsorlu və ya kommersiya məzmunu ilə əlaqədar hərəkətləriniz haqqında məlumatlardan istifadə etmək icazəsi. Adınızdan, profil şəklinizdən və Facebook-dakı hərəkətləriniz haqqında məlumatdan Məhsullarımızda nümayiş etdirdiyimiz reklamlar, təkliflər və digər sponsorlu və ya kommersiya məzmununun yanında və ya onlarla əlaqədar kompensasiyasız istifadə etməyimizə icazə verirsiniz. Məsələn, dostlarınıza reklamlı tədbirlə maraqlandığınızı və ya Facebook-da reklamlarını göstərməyimiz üçün bizə ödəniş etmiş brendin yaratdığı Facebook səhifəsini bəyənməyinizi göstərə bilərik. Reklamlar və belə məzmunu yalnız Meta məhsullarında etdiyiniz hərəkətləri görmək üçün icazəsi olan insanlar görür. Reklam parametrləriniz və seçimləriniz haqqında ətraflı məlumat alın.
- İstifadə etdiyiniz və ya endirdiyiniz proqram təminatını yeniləmək icazəsi: Proqram təminatımızı endirdiyiniz və ya istifadə etdiyiniz halda lazım gəldikdə bu proqram təminatı üçün yeniləmələri endirib quraşdırmağımıza icazə verirsiniz.
4. Əqli mülkiyyətimizdən istifadə ilə bağlı məhdudiyyətlər
Məhsullarımızda mövcud olan və təmin edilən əqli mülkiyyət hüquqları ilə qorunan məzmundan (məsələn, yaratdığınız və ya Facebook-da paylaşdığınız məzmuna əlavə etdiyiniz şəkillər, dizaynlar, videolar və ya səslərimiz) istifadə etdiyiniz halda məzmunumuz üzərində (sizə məxsus olan hissəsi üzərində deyil) bütün hüquqları saxlayırıq. Müəlliflik hüquqlarımız və ya ticarət nişanlarımızdan (və ya hər hansı bənzər nişanlardan) yalnız Brenddən İstifadə Təlimatlarımızda aşkar şəkildə icazə verildiyi şəkildə və ya əvvəlcədən verdiyimiz yazılı icazəmizlə istifadə edə bilərsiniz. Bununla bağlı tətbiq edilən qanunvericilik çərçivəsində istisna və ya məhdudiyyətlərin tətbiq edildiyi hallar, yaxud davranışınızın Meta-nın xətaların aşkar edilməsinə görə mükafatlandırma proqramının əhatə dairəsinə daxil olduğu hallar istisna olmaqla, məhsullarımız və ya onların komponentlərini dəyişdirmək, tərcümə etmək, onlardan törəmə məhsullar hazırlamaq, dekompilyasiya etmək və ya onların texnologiyasını təhlil etmək, yaxud onların mənbə kodunu başqa şəkildə çıxarmağa cəhd etmək üçün yazılı icazəmizi almalısınız. 4. Əlavə müddəalar
1. İstifadəçi razılaşmamızın yenilənməsi
Biz xidmətlərimizi təkmilləşdirmək üçün durmadan işləyir və Məhsullarımızı siz və icmamız üçün daha yaxşı etmək üçün yeni funksiyaları inkişaf etdiririk. Nəticə etibarilə, xidmət və təcrübələrimizi dəqiqliklə təqdim etmək, Məhsul və xidmətlərimizdə təhlükəsiz və əmin təcrübələri təşviq etmək və/və ya tətbiq edilən qanunlara riayət etmək üçün bu İstifadəçi Razılaşmasını vaxtaşırı olaraq yeniləməyimizə ehtiyac ola bilər. Qanunla başqa hal nəzərdə tutulmayıbsa, bu Razılaşmaya dəyişiklik etməzdən əvvəl sizə bildirəcək və dəyişiklik qüvvəyə minməzdən əvvəl sizə onu dəyərləndirmə fürsəti verəcəyik. Yenilənmiş Razılaşma qüvvəyə mindikdən sonra Məhsullarımızdan istifadə etməyə davam etsəniz, dəyişiklikləri nəzərə almalı olacaqsınız. Ümid edirik, Məhsullarımızdan istifadə etməyə davam edəcəksiniz, lakin yenilənmiş Razılaşmamızı qəbul etmirsinizsə və artıq Facebook icmasının bir hissəsi olmaq istəmirsinizsə, hesabınızı istənilən vaxt silə bilərsiniz. 2. Hesabın fəaliyyətinin dayandırılması və ya ləğv edilməsi
Facebook-un insanların özlərini ifadə edərkən, eləcə də fikir və ideyalarını paylaşarkən rahat və təhlükəsiz hiss edəcəyi yer olmasını istəyirik. Öz mülahizəmizə əsasən Razılaşmamızı və ya Siyasətlərimizi, xüsusilə də İcma standartlarıımızı açıq-aydın, ciddi şəkildə və ya dəfələrlə pozduğunuzu müəyyən etdiyimiz halda Meta şirkət məhsullarına giriş imkanınızı dayandıra, yaxud həmişəlik deaktiv edə və hesabınızı həmişəlik deaktiv edə, yaxud silə bilərik. Başqa insanların əqli mülkiyyət hüquqlarını dəfələrlə pozduğunuz və ya qanunla bizdən tələb olunan hallarda da hesabınızı deaktiv edə, yaxud silə bilərik. Hesabınız qeydiyyatdan sonra təsdiqlənməsə, uzun müddət istifadə olunmasa və qeyri-aktiv qalsa, yaxud icazəniz olmadan başqasının ondan istifadə etmə ehtimalının olduğunu aşkar etsək və hesabın sizə məxsus olduğunu təsdiqləyə bilməsək, hesabınızı deaktiv edə və ya silə bilərik. Hesablarınızı necə deaktiv etməyimiz və silməyimiz haqqında ətraflı məlumat alın. Bu tədbirin görülməsi biz və ya başqaları üçün hüquqi məsuliyyət yaratmırsa; istifadəçi icmalarımıza zərər vermirsə; hər hansı xidmətlərimiz, sistemlərimiz və ya Məhsullarımızın tamlığı və ya fəaliyyətinə mane olmursa; texniki məhdudiyyətlər səbəbindən məhdudlaşdırılmamışıqsa; yaxud qanunla bu tədbiri görməyimiz qadağa edilməyibsə, bu cür tədbir gördüyümüz hallarda bu haqda məlumat verəcək və dəyərləndirmə sorğusu göndərməyiniz üçün hər hansı seçimləri izah edəcəyik. Hesabınız deaktiv edildiyi halda görə biləcəyiniz tədbirlər və hesabınızı səhvən deaktiv etdiyimizi düşündüyünüz halda bizimlə necə əlaqə saxlayacağınız haqqında ətraflı məlumat ala bilərsiniz. Hesabınızı özünüz silsəniz, yaxud biz deaktiv etsək və ya silsək, bu Razılaşma aramızdakı müqavilə kimi ləğv olunacaq, lakin bu müddəalar qüvvədə qalacaq: 3, 4.2-4.5. 3. Məsuliyyətin məhdudlaşdırılması
Bacardığımız qədər ən yaxşı Məhsulları təmin etmək və istifadə edən hər kəs üçün aydın təlimatlar müəyyən etmək məqsədilə səylə çalışırıq. Bununla belə, Məhsullarımız "olduğu kimi" təmin olunur və onların həmişə təhlükəsiz, xətasız və ya etibarlı olacağına, yaxud kəsinti, gecikmə və ya çatışmazlıq olmadan işləyəcəyinə heç bir zəmanət vermirik. Qanunla icazə verilən dərəcədə SATIŞ ÜÇÜN YARARLILIĞI, XÜSUSİ MƏQSƏD ÜÇÜN UYĞUNLUĞU, VƏZİFƏ VƏ QEYRİ-POZUNTU HALI İLƏ BAĞLI NƏZƏRDƏ TUTULAN ZƏMANƏTLƏR DAXİL OLMAQLA AÇIQ VƏ YA NƏZƏRDƏ TUTULAN BÜTÜN ZƏMANƏTLƏRİ RƏDD EDİRİK. İnsanların hərəkətləri və ya dediklərinə nəzarət etmir, yaxud bunu yönləndirmir və onların fəaliyyətlərinə, yaxud davranışlarına (onlayn və ya oflayn) və ya paylaşdıqları hər hansı məzmuna (o cümlədən təhqiramiz, uyğun olmayan, ədəbsiz, qanunsuz və digər mübahisəli məzmun) görə məsuliyyət daşımırıq. Məhsullarımızla bağlı nə zaman problem yarana biləcəyini proqnozlaşdıra bilmərik. Buna görə də tətbiq olunan qanunla icazə verilən maksimum dərəcədə öhdəliyimiz məhdudlaşdırılır və hətta bu cür zərərlərin olma ehtimalı barədə bizə xəbərdarlıq edilsə belə, hər hansı gəlir, qazanc, məlumat və ya data itkisinə və ya bu Razılaşma və ya Meta məhsullarından qaynaqlanan, yaxud onlarla əlaqədar əhəmiyyətli, xüsusi, dolayı, cəza tələb edən və ya təsadüfi zərərlərə (lakin səhlənkarlıq daxil olmaqla məsuliyyətin yaranmasının səbəblərindən və əsaslarından asılı olmayaraq) görə heç bir halda öhdəlik daşımayacağıq. Bu Razılaşma, yaxud Meta məhsullarından və ya onlarla əlaqədar yaranan ümumi öhdəliyimiz 100 dolları və ya son on iki ayda bizə ödədiyiniz məbləği keçməyəcək. 4. Mübahisələr
Sizinlə aramızdakı mübahisələri məhdudlaşdıra, yaxud bunun qarşısını ala bilməyimiz üçün aydın qaydalar təmin etməyə səy göstəririk. Lakin mübahisə yarandığı halda onun harada həll edilə biləcəyini və hansı qanunların tətbiq olunacağını əvvəlcədən bilməkdə fayda var. Siz və Meta bu Razılaşma və ya Meta məhsullarına giriş imkanınız, yaxud onlardan istifadənizdən qaynaqlanan və ya bununla əlaqədar aramızda olan hər hansı iddia, iddia üçün əsas və ya mübahisənin müstəsna olaraq Kaliforniyanın Şimal Bölgəsi üzrə ABŞ Dairə Məhkəməsində və ya San-Mateo qraflığında yerləşən ştat məhkəməsində həll edilməsinə razılıq verirsiniz. Bundan başqa, belə iddiaların həll edilməsi üçün bu məhkəmələrdən hər hansı birinin fərdi yurisdiksiyasına tabe olmağa və Kaliforniya Ştatının qanunlarının bu Razılaşmanı və hər hansı iddia, iddia üçün əsas və ya mübahisəni kolliziya normaları nəzərə alınmadan tənzimləməsinə razılıq verirsiniz. Yuxarıdakıların mahiyyətinə xələl gətirmədən Meta-nın öz mülahizəsinə görə sizə qarşı hər hansı iddia, iddia üçün əsas və ya mübahisəni yaşadığınız ölkənin iddia üzərində yurisdiksiyaya sahib olan hər hansı səlahiyyətli məhkəməsinə təqdim edə biləcəyini qəbul edirsiniz. 5. Digər
- Bu Şərtlər (əvvəlki adı: Hüquqlar və Məsuliyyətlərə dair Bildiriş) sizinlə Meta Platforms, Inc. arasında Məhsullarımızdan istifadə etməyinizlə əlaqədar tam müqavilədən ibarətdir. O, istənilən əvvəlki razılaşmadan daha üstün hüquqi qüvvəyə malikdir.
- Təklif etdiyimiz bəzi Məhsullar əlavə şərtlərlə də tənzimlənir. Bu Məhsulların hər hansı birindən istifadə etsəniz, əlavə şərtlər təqdim olunacaq və sizinlə razılaşmamızın tərkib hissəsinə çevriləcək. Məsələn, Məhsullarımıza reklamların alınması, məhsulların satılması, tətbiqlərin tərtibatı, biznesiniz adından qrup və ya səhifənin idarə edilməsi, yaxud ölçmə xidmətlərimizdən istifadə edilməsi kimi kommersiya və ya biznes məqsədləri ilə çıxış əldə edir, yaxud onlardan istifadə edirsinizsə, Kommersiya Şərtlərimizi qəbul etməlisiniz. Tərkibində musiqi olan məzmun paylaşırsınızsa, Musiqi ilə bağlı Qaydalarımıza riayət etməlisiniz. Hər hansı əlavə şərtlərdə bu Razılaşma ilə ziddiyyətli bəndlər olarsa, əlavə şərtlər bu ziddiyyətli məsələlərdə daha üstün hüquqi qüvvəyə malik olmalıdır.
- Bu Razılaşmanın hər hansı hissəsinin tətbiq edilməsi mümkün olmazsa, bu hissədə hüquqi qüvvəyə malik olması üçün lazım olan dərəcədə düzəlişlər edilməli və bu, mümkün olmazsa, həmin hissə Razılaşmadan ayrılmalı və sənədin qalan hissəsi hüquqi qüvvəsini tam saxlamalıdır. Bu Razılaşmanın hər hansı şərtinin tətbiqinə nail ola bilmədiyimiz halda, bu, həmin şərtdən imtina etməyimizi göstərmir. Razılaşmaya edilən hər hansı düzəlişlər və ya ondan imtina edilməsi yazılı şəkildə tərtib edilməli və tərəfimizdən imzalanmalıdır.
- Bu Razılaşma çərçivəsində hüquq və öhdəliklərinizi razılığımız olmadan hər hansı şəxsə ötürə bilməzsiniz.
- Hesabınıza xatirə statusu verildiyi halda hesabınızı idarə etmək üçün şəxs (hesabın varisi) təyin edə bilərsiniz. Parametrlərdə bu seçimi aktiv etsəniz, hesabınıza xatirə statusunun verilməsindən sonra yalnız hesabınızın varisi, yaxud hüquqi qüvvəyə malik olan vəsiyyətnamədə və ya bənzər hüquqi sənəddə vəfat etdiyiniz və ya fəaliyyət qabiliyyətini itirdiyiniz halda məzmununuza çıxışa sahib olmasını açıq şəkildə göstərdiyiniz şəxs hesabınızdakı məlumatların qismən açıqlanmasını təmin edə bilər.
- Bu İstifadəçi razılaşması hər hansı üçüncü tərəf benefisiarlara hüquqlar vermir. Bu Razılaşma ilə nəzərdə tutulmuş bütün hüquq və öhdəliklərimiz aktivlərin birləşdirilməsi, satınalınması və ya satışı, yaxud qanun çərçivəsində və ya başqa formada sərbəst şəkildə ötürülə bilər.
- Bəzi hallarda hesabınızın istifadəçi adını dəyişməyimizə ehtiyac ola bilər (məsələn, başqa biri istifadəçi adına sahib olduğunu iddia edirsə və o, gündəlik həyatınızda istifadə etdiyiniz adla əlaqədar deyilsə).
- Məhsul və xidmətlərimizlə bağlı rəy və təkliflərinizi hər zaman yüksək dəyərləndiririk. Bununla belə, rəy və digər təkliflərdən hər hansı məhdudiyyət və ya sizə kompensasiya ödəmək öhdəliyi olmadan istifadə edə bilərik və onların məxfiliyinin saxlanılması üçün məsuliyyət daşımırıq.
- Sizə aşkar şəkildə verilməmiş bütün hüquqları özümüzdə saxlayırıq.
5. Sizə tətbiq edilə biləcək digər şərt və siyasətlər
- İcma standartları: Bu təlimatlar Facebook-da paylaşdığınız məzmun və Facebook və digər Meta məhsullarında fəaliyyətinizlə bağlı standartlarımızı müəyyən edir.
- Kommersiya şərtləri: Hər hansı kommersiya və biznes məqsədi, o cümlədən reklam yerləşdirilməsi, Platformamızda tətbiqin işlədilməsi, qiymətləndirmə xidmətlərimizdən istifadə edilməsi, biznes adından qrup və ya səhifənin idarə edilməsi, yaxud məhsul və ya xidmətlərin satılması məqsədilə Məhsullarımıza çıxış əldə etdiyiniz və ya onlardan istifadə etdiyiniz hallarda bu şərtlər tətbiq edilir.
- İcmanın ödəniş şərtləri: Bu şərtlər Meta məhsullarında və ya onlar vasitəsilə edilən ödənişlərə tətbiq edilir.
- Kommersiya siyasətləri: Bu təlimatlar Facebook, Instagram və WhatsApp-da satış üçün məhsul və ya xidmətlər təklif etdiyiniz hallarda tətbiq edilən siyasətləri əhatə edir.
- Musiqi təlimatları: Bu təlimatlar hər hansı Meta məhsullarında tərkibində musiqi olan məzmun paylaşdığınız hallarda tətbiq edilən siyasətləri əhatə edir.
- Reklam siyasətləri: Bu siyasətlər Meta məhsullarında reklam yerləşdirən tərəfdaşlara tətbiq edilir və Meta məhsullarında reklam yerləşdirən tərəfdaşların hansı növ reklam məzmununu paylaşa biləcəyini müəyyən edir.
- Özünəxidmət formalı reklamlar üçün şərtlər: Bu şərtlər reklamlar və digər kommersiya xarakterli və ya sponsorlu fəaliyyət və ya məzmun yaratmaq, təqdim etmək və ya yerləşdirmək üçün özünəxidmət formalı reklam interfeyslərindən istifadə etdiyiniz hallara tətbiq edilir.
- Facebook səhifələri, qrupları və siyasətləri üzrə siyasət: Bu təlimatlar Facebook səhifəsi, qrupu və ya tədbiri yaratdığınız və ya idarə etdiyiniz, yaxud Facebook-dan təşviqat kampaniyasını idarə etmək və ya insanlara çatdırmaq üçün istifadə etdiyiniz hallara tətbiq edilir.
- Meta Platforma siyasəti: Bu şərtlər digər istifadəçilərin funksionallığı inkişaf etdirməsinə, Meta məhsullarından məlumatları çıxarmasına və ya bizə məlumat verməsinə imkan verən API-lər, SDK-lar, alətlər, plaginlər, kod, texnologiya, məzmun və xidmətlər dəstinin istifadə edilməsinə tətbiq edilir.
- Tərtibatçılar üçün ödəniş şərtləri: Bu şərtlər Facebook ödənişlərindən istifadə edən tətbiq tərtibatçılarına tətbiq edilir.
- Meta brend resursları: Bu təlimatlar Meta ticarət nişanları, loqoları və ekran görüntülərinin istifadə edilməsinə tətbiq edilən siyasətləri əhatə edir.
- Tövsiyə Təlimatları: Facebook tövsiyə qaydaları və Instagram tövsiyə qaydaları məzmunun tövsiyə edilməsi və edilməməsi üçün standartlarımızı əhatə edir.
- Canlı yayımla bağlı siyasətlər: Bu siyasətlər Facebook Live-də yayımlanan bütün məzmuna tətbiq edilir.
Son düzəliş tarixi: 26 iyul 2022-ci il
